Informaziuns da l'occurrenza
La «Notg lunga da las baselgias» è stada l’emprima giada ils 17 da settember 2016 en circa 80 baselgias en il chantun Argovia. La «Notg lunga da las baselgias» da l’onn suandant ha alura gì lieu en plirs chantuns (Argovia, Berna, Giura, Solothurn e Nidwalden). La terza «Notg lunga da las baselgias» è stada ils 28 da matg 2021. Radund 30'000 umens, dunnas ed uffants han visità in’occurrenza en pli che 470 plaivs e pravendas ch’èn sa participadas, betg sulettamain en l’Argovia, mabain era en las baselgias refurmadas e catolicas en ils chantuns Berna, Giura, Solothurn, Basilea Champagna, Turitg, Zug e Grischun. La «Notg lunga da las baselgias» na datti betg sulettamain en Svizra. Dapi intgins onns avran tschients baselgias lur portas era en l’Austria, la Tschechia, l’Ungaria e l’Estonia.
Tradiziun ed experiment, usità e nunusità – qua hai plaz per tut e tuts: la «Notg lunga da las baselgias» è ina pussaivladad da far novas experientschas. Visitadras e visitaders pon vesair co che las baselgias s’integreschan ozendi en la societad dal vitg, da la citad, dal quatier u da la vischnanca: saja quai cun projects socials e caritativs, la baselgia sco oasa per la tschertga dal senn da la veta, ina plattafurma per il barat d’opiniuns ed experientschas, per sviluppar visiuns d’in meglier mund.
La «Notg lunga da las baselgias» vul mussar tge che «baselgia» è tut. Ed en il medem temp intimar da sa confruntar cun ils «fiers chalira» (er interns da la Baselgia), che occupan e pertutgan ils umans.
I basta da simplamain ir, entras ed esser preschent! Vus na stuais betg esser infurmà oravant, ed ins na sto er betg temair insatge u insatgi. A las diversas occurrenzas chattais Vus (leger dapli) segir insatge adattà! Las baselgias vulan dar la pussaivladad a las visitadras ed als visitaders d’entrar en contact libramain e senza obligaziuns. Mintgina e mintgin duai sa decider sez d’entrar svelt e fuffragnar, u da s’approfundir intensivamain en ina tematica.
Il program envida da giudair, da sa participar e dad esser avert pil contact – cun il silenzi, pleds, ils mirs da la baselgia… Qua e là pudessi forsa esser in zic stretg sche l’interess è grond. L’avantatg è ch’ins na sto betg s’annunziar e reservar bigliets d’entrada.