Ils 28 da matg 2021 han pli che 470 plaivs e pravendas da las Baselgias chantunalas refurmadas e catolicas da 10 chantuns organisà cun success la davosa Notg lunga da las baselgias. Cun pli che 30'000 visitadras e visitaders èsi stà in bel success. Quest onn, numnadamain venderdi, ils 2 da zercladur 2023, ha la quarta ediziun lieu cun manifestaziuns ecumenas en plaivs e pravendas dals chantuns Argovia, Berna, Giura, Solothurn, Fribourg, Lucerna, Grischun, Basilea Champagna, Turgovia, Zug e Turitg. Questa Notg lunga da las baselgias è fixada il medem di sco quella en l’Austria ed auters pajais europeics.

Vid al concept cumprovà da las ediziuns 2016, 2018 e 2021, cun mintgamai tranter 10'000 e 30'000 visitaders na sa mida nagut. Quest concept sa basa sin la lavur custaivla e sin in grond engaschi da blers voluntaris.

Cun la coordinaziun da las Baselgias chantunalas han las plaivs e pravendas maun liber da realisar lur atgnas ideas. Finamira èsi da laschair entrar umans en las baselgias e da pussibilitar bellas experientschas, buns contacts e festivitads da gener spezial.

Finamira èsi da mussar co che baselgias sa fan valair ozendi en la veta da la societad, saja quai cun experientschas ed oasas per la tschertga dal senn, cun projects socials e caritativs, u cun occasiuns per il barat d’opiniuns e vistas.

Las Baselgias chantunalas da l’Argovia surprendan er per l’ediziun 2023 la direcziun generala dal project sco er cun tgirar la pagina d’internet en quater linguatgs. Per l’organisaziun e la realisaziun entaifer ils chantuns definischa mintga Baselgia chantunala las persunas respunsablas.

En la pagina www.langenachtderkirchen.ch chattais Vus er tuttas infurmaziuns ed impressiuns da las davosas occurrenzas.