Salid dals iniziants
Grüezi, Bonjour, Buongiorno, Bainvegni
La «Notg lunga da las baselgias» è s’etablida definitivamain en Svizra. Jau ma legr spezialmain ch’il moviment ha fatg il sigl en la Romandia ed en la Rumantschia. I sa mussa ina giada dapli: Bunas ideas na conuschan nagins cunfins linguistics. La «Notg lunga da las baselgias» è cunquai daventada in’occurrenza gronda ecumena sur l’entir territori da noss pajais. Ella collia umans sur ils cunfins da linguatgs, confessiuns, baselgias e plaivs. Ella avra las portas da las baselgias ad umans che sa participeschan uschiglio damain a las purschidas usitadas da la baselgia. La «Notg lunga da las baselgias» pussibilitescha d’emprender a conuscher la baselgia da nov ed a moda multifara, ella envida da far scuviertas en il sectur spiritual e profan da la vita d’ina cuminanza.
Christoph Weber-Berg, president dal cussegl da baselgia, Baselgia refurmada chantunala Argovia
Allegra Notg lunga
Gia la quarta giada datti en Svizra ina «Notg lunga da las baselgias». Il format da success ha chattà accoglientscha: Blers umans survegnan ina nova vista sin baselgia, religiun e cretta. En il concept da la Notg lunga hai bler plaz: Tradiziun ed experiment, classic e modern, divertiment e meditaziun. L’occurrenza stimulescha betg sulettamain il profund, mabain va er en il lad. Suandand l’exempel da l’Austria han las Baselgias chantunalas da l’Argovia cumenzà il 2016 ad organisar en Svizra la Notg lunga. Adina dapliras Baselgias chantunalas cun plaivs e pravendas èn s’assoziadas a l’idea. Il 2018 èn Berna, Giura, Solothurn e Nidwalden sa participadas. Alura èsi ì vinavant da maniera rasanta il 2021 e quest onn 2023: L’entira Svizra dal nordvest ed ulteriurs chantuns sco Turitg e Friburg han sa laschà infectar dal virus «Notg lunga da las baselgias». Ella surmunta betg sulettamain il «Röstigraben» mabain daventa cun il chantun Grischun er quadrilingua. Jau engraziel a las organisaturas ed als organisaturs da tuttas plaivs e pravendas ch’èn ils 2 da zercladur 2023 da la partida ed als tramet il clom il pli cordial: Allegra!
Luc Humbel, president dal cussegl da baselgia da la Baselgia roman-catolica dal chantun Argovia